|
Ionad Saor-thoileach na h-Eileanan an Iar – Pròiseact airson Òganaich
saor-thoileach
Tha Ionad Saor-thoileach na h-Eileanan an Iar (ISEI) na cathrannas beag
ionadail a bhios a’ misneachadh, a’ toirt taic agus a’ brosnachadh an roinn
saor-thoileach. Chuireadh air chois e mar aon de cheithir deuchainnean air an
tuath ann an Alba san Fhaoilleach 1995. Leudaich e air feadh na h-Eileanan an
Iar agus tha seachdnar luchd-obrach pàirt thìde ag obair ann an oifisean ann an
Steòrnabhagh, an Tairbeart, Nis, Baile a’ Mhanaich agus Bàgh a’ Chaisteil. Tha
a’ bhuidheann air a’ ruith le comataidh de dhaoine a tha gu mòr an sàs ann an
obair choimhearsnachd bho air feadh na h-eileanan agus thathas an-dràsta an lùib
sgoiltean, foghlam coimhearsnachd, obair shoisealta agus iomadh buidheann
coimhearsnachd eile.
Tron cuid obrach thàinig e am follais gun robh feum air diofar seòrsachan
daoine a thoirt a-steach air obair saor-thoileach agus mar phàirt dhen seo chuir
iad air dòigh pròiseact sònraichte a thàladh barrachd dhan òigridh a-steach.
Airson seo a thoirt gu buil, dh’fheumadh luchd-obrach san Ionad Saor-thoileach
sa chiad àite barrachd eòlais a chuir air na buidhnean sna sgìrean gus feuchainn
ri toirt air an òigridh a dhol a-steach airson na h-obrach seo. A thuilleadh air
an seo dh’fheumte rannsachadh na feumalachdan a bh’ aig an òigridh gus obrachadh
gu saor-thoileach ann an suidheachadh ionadail. Gus seo a choilionadh cleachdar
stòrdata nàiseanta nan saor-thoileach, agus nìthear ùrachadh air an fhiosrachadh
a th’ aca mu na buidhnean. ’S e th’ anns an amhairc aca faighinn faisg air an
òigridh, buidheann nach eil pailt ann an obair saor-thoileach agus iad sin a
thàladh thuice. Thathas den bheachd gum bi an fhiosrachadh bhon òigridh feumail
ann a bhith a’ gabhail ceumannan ùra.
Tha a’ phròiseact seo air taic fhaighinn bho Leader+ agus Iomairt nan Eilean
Siar gus cuideachadh a thoirt dhaibh leis a’ chiad dà bhliadhna dhan phìleat
agus bithtear a’ coimhead ri daoine òga a thoirt a-steach air an seo tro na
buidhnean coimhearsnachd a th’ ann mu thràth. Bithear gam brosnachadh cuideachd
le teicneolasan ùra agus a dhèanamh nas fhasa dhaibh toiseachadh anns na
buidhnean a tha a’ dol an-dràsta.
Thuirt Co-òrdanaiche an Ionaid, Ciorstaidh NicDhòmhnaill, “Tha sinn air ar
dòigh gu bheil cothrom againn barrachd a dhèanamh leis an òigridh gus an tàladh
gu obair saor-thoileach. ’S e ceum mòr a th’ ann, a thaobh an obair a dhèanamh
nas fhosgailte do dhaoine, gu bheil làrach-lìn againn dhuinn fhèin agus goireas
air-loidhne an cois an stòr-data.
Tha a’ phròiseact a’ sealltainn dòigh smaoineachaidh ùr ann an dàimh ri
daoine òga agus mar a ghabhas an cuid sgìlean agus comasan a chuir an sàs. Tha e
adhartach leis gu bheil teicneolas ùr air a chleachdadh gus ùidh a chruthachadh
anns an obair seo. Thathas ag oidhirpeachadh air a’ choimhearsnachd a’
neartachadh le bhith a’ toirt a-steach an òigridh cho tràth ’s a
ghabhas.”
|
